RECIP III

 E motornan RECIP ta un di e alternativanan faborito den e Plan Strategico “Energia Aruba 2025”. Nan ta core na un nivel di eficiencia di entre 41% - 43% compara cu 28% - 29% di e combinacion Boiler-Turbina. Los di esey, ainda ta desaroya estudionan pa sigui uza biento como fuente di energia sostenibel.
Ta un serie di consideracion a tene na cuenta na momento di scoge e compania pa desaroya e set di motor RECIP nobo den WEB. Hunto cu PIB entre otro a realisa e analisis y evaluacion financiero di e ofertanan di MAN Diesel di Alemania y Wärtsila di Finlandia, pa desaroya e proyecto; e fase tres di e unidadnan RECIP. E puntonan di  evaluacion economico a haci e opcion Wärtsila esun mas adecua y optimal.

E ekipo di evaluacion a duna e recomendacion aki na Gerencia di WEB y Hunta di Comisario di e Utilities Aruba pa nan aprobacion. Ing. Francis Ras como Project Leader ta duna un impresion di e desaroyo di prijs pa a cumpra e motor pa e fase tres di RECIP. Inicialmente e euro tabata basta halto na momento cu tabata negociando. Na dado momento e euro versus e dollar a resulta na fabor di WEB den e negociacion y haci un ganashi substancial  firmando trempan cu Wärtsilä. Sr. Ras ta papia di economisa entre 6 pa 7 miyon dollar.

Ora a yega na areglo di e prijs y a negocia e detayenan tecnico comercial, e team di Wärtsilä y esun di WEB a firma e contracto dia 2 di juli, hasta prome cu e ceremonia oficial. Wärtsila ta gana e oferta basa riba e prijs cu el a presenta  y e “return on investment” cu esaki ta representa pa WEB. A haci analisis di gasto di operacion y gasto di mantenemento tanto pa MAN como Wärtsila y a compara e dos mashinnan. E resultado di e comparacionnan tabata hopi similar, pero Wärtsila a sobresali.

Otro aspecto importante pa loke ta aspectonan tecnico, ta cu e consumo di combustibel di Wärtsilä a resulta un poco miho cu su competencia MAN. Es decir pa cada bari cu uza den e mashin Finlandes, ta saca mas energia. Un aspecto mas cu a hunga un rol ta cu WEB tabatin experiencia cu schedule di trabou di Wärtsila. E compania a entrega e fase II di e RECIPnan den e tempo cu nan a priminti. Den e fase di RECIP III, Wärtsilä ta priminti finalisacion di trabou den 14 luna compara cu 17 luna di MAN. Esaki evidentemente tin impacto ya cu cada luna cu e mashin no ta operando, no por traduci esey bek den reduccion di uzo di fuel oil.

Klik pa wak album RECIP III !