Vader Piet - Web Aruba N.V.

Na 2004 a cuminsa cu e prome esfuerso pa desaroya un parke di molina di biento na Vader Piet. Mas eficiencia y menos fuel ta resultado di e proyecto aki pa construi un parke di 10 molina di biento cu capacidad di 3 megawatt ,pa un total di 30 megawatt. Considerando e variabel nan manera intensidad y velocidad di biento continuo, ta calcula cu e parke lo genera 18 megawatt averahe pa dia. Esaki ta nifica 18% di nos uzo diario di 100 megawatt. Un proyecto cu ta pone Aruba na top di paisnan cu ta produci energia, uzando biento como fuente di energia.
 
Klik pa wak con ta construi un molina di biento!

Un joint venture di compania Europeo a lanta Windpark Vader Piet N.V. cu lo bende e electricidad cu lo genera, exclusivamente na W.E.B. Aruba N.V. Esaki ta e formato cu ta haci construccion di e parke di molina di biento posibel y economicamente viabel. W.E.B. Aruba N.V. lo inverti pa core un kabel for di Vader Piet t’e na e Sub-station na San Nicolas.

Ademas W.E.B. Aruba N.V. a laga haci un asina yama estudio MER di impacto riba medio ambiente, prome cu a cuminsa desaroya e proyecto. Lo finalisa construccion di e parke di molina na fin di 2009. Un proyecto di energia limpi (green energy) y cu lo yuda reduci e dependencia riba fuel oil. E proyecto ta cuadra cu e pensamento di W.E.B. Aruba N.V. pa entrega continuo di suficiente electricidad na N.V. ELMAR na un tarifa y servicio optimal.