Awa di calidad

E awa di bebe di Aruba su calidad ta entre e mihonan na mundo, hasta compara cu e miho marcanan di awa di boter. E awa di cranchi ta awa destila puro, reminalisa den un sistema moderno, den cual e awa ta absorba mineralnan importante manera calki pero tambe e gas oxigeno. Esaki ta duna e awa su sabor delicioso. E awa di bebe di cranchi ta sigur y no tin ningun peliger pa consumo, no tin mester di ningun tratamento mas manera herbemento; esaki ta un luho cu mayoria di e suministradonan di awa na mundo no tin. Masha poco pais conoce e luho aki.
 
W.E.B. Aruba N.V. tin procedura vigente pa salvaguardia e siguridad y calidad di e suministro y e distribucion di awa. Na W.E.B. Aruba N.V. ta mantene un programa di testmento di e calidad di awa tur dia, esaki ta pa loke ta substancianan kimico. Como ehempel di nos calidad excelente nos por menciona cu tambe ta haci test na 21 sitio strategico rond di nos Isla riba un bes pa luna. Organisacion Mundial di Salud su standard pa salunan disolvi den awa di bebe ta di 600 parti pa miyon (ppm). E awa di Aruba ta contene entre 5 pa 15 ppm di salunan, esta 40 biaha miho. Laboratorio di Gobierno (Landslaboratorium) ta haci test bacteriologico dos bes pa luna na e mesun sitionan strategico menciona. E cantidad di bacteria ta consistentemente bou di nivelnan cu por detecta, pues di un grado di limpieza y pureza sumamente halto.