Balashi 76, P.O. Box 575, Oranjestad, Aruba
Tel. : (297) 525-4600 Fax: (297) 585-7681

E inversionnan a resulta den logronan grandi pa Aruba. Un aumento di eficiencia di 21% desde aña 2005.
A baha consumo di fuel oil cu un (1) mil bari pa dia. Di 6 mil bari pa dia pa awe menos cu 5 mil bari pa dia.
Dor di sigui inverti WEB ta proyecta cu den 2013 lo por produci mas awa y coriente, bahando consumo di fuel oil te na aproximadamente 3 mil 500 bari pa dia.
Esaki tur tabata y ta posibel dor di e maneho financiero skerpi cu WEB tin, cual a gana e confiansa di institutonan financiero y banconan local y internacional. WEB semper a mantene su mes financieramente sano pa a haya fiansa di banco. WEB pa su bon nomber semper a haya placa fia pa asina haci inversionnan necesario pa cumpli cu demanda y pa mehoracion continuo di nos eficiencia di produccion.

Desde cuminsamento di aña WEB ta confronta aumento constante di prijs di fuel oil poniendo un presion grandi riba nos condicion financiero. Esaki ta rekeri aumento di tarifanan pa mantene WEB su condicion financiero sano pa por cumpli cu su obligacionnan. Riba peticion di accionista, WEB a absorba e aumento di prijs di fuel oil; esaki no por mas.

E consecuencia di no ricibi entrada pa cubri e gastonan real ta pone WEB den un situacion financiero malo. WEB ta core riesgo di perde financiamento necesario pa termina proyectonan RECIP-3, SWRO fase 2 y financiamento pa proyecto di gas y extension di parke di molina di biento.

WEB ta consciente di efectonan di aumento di tarifa, pero realidad ta cu no tin alternativa viabel na e momento aki. WEB no por warda mas. WEB ta suplica tur cliente pa maneha nan consumo di awa y coriente na un manera consciente.