Balashi 76, P.O. Box 575, Oranjestad, Aruba
Tel. : (297) 525-4600 Fax: (297) 585-7681

COMUNICADO DI PRENSA

WEB TA RICIBI ‘PROOF NOT PROMISES AWARD’
DI GENERAL ELECTRIC

_____________________________________________________________________________________________________

ORANJESTAD – Recientemente WEB su departamento di produccion di awa a ricibi e ‘Proof Not Promises Award’ di e compania internacionalmente renombra General Electric (GE). WEB a ricibi e reconocimento aki pa su reduccion significante di uzo di combustibel pa SWRO #1, aumentando asina e eficiencia di e planta aki. WEB ta e prome compania na Aruba cu a logra haya e award aki. GE mundialmente ta reconoce clientenan na momento cu nan tin beneficio economico positivo di nan operacion cu makinaria di GE.

General Electric regularmente ta asisti WEB den proyectonan pa hisa eficiencia di operacion. Un di e proyectonan aki ta e planta SWRO #1, caminda a constata cu na su inicio no tawatin un operacion stabil y eficiente. Pa motibo di contaminacion biologico (bio-fouling) e consumo di energia electrico tawata 11% mas halto cu pronostica. E aumento di consumo di energia electrico en combinacion cu un reduccion di produccion a resulta den un operacion ineficiente y caro.

Saneacion
Pa remedia esaki a ehecuta diferente procedura pa suavisa e bio-fouling, sinembargo ningun di e limpiesanan aki a resulta positivo. Den un esfuerso conhunto, WEB a diseña un procedura di saneacion pa limpiesa di e tuberia completo, membrananan y demas equipo di SWRO #1. Banda di e procedura di saneacion nobo, hefe di sector di produccion di awa di WEB, sr.  Filomeno (Boey) Marchena y operador di planta di awa, sr. Robert Wever a diseña un proceso nobo pa haci e membrananan di e parti di SWRO y BWRO mas limpi. Despues di a completa e saneamento, a pone SWRO #1 bek den servicio cu un consumo di energia electrico di 3.72 kwh/m3 y un produccion di 8170 m3 pa dia. Esaki ta nifica respectivamente un aumento di eficiencia di 16.4% y un aumento di 2.2% den producion di awa pa dia. Reduccion di consumo di energia electrico automaticamente ta nifica reduccion tambe den consumo di fuel.

Innovativo
E Proof Not Promises Award sigur ta prueba e espirito innovativo ilustra den vision di WEB. Gerencia di WEB ta orguyoso y ta gradici Filomeno (Boey) Marchena, Robert Wever y henter e team di Productie Water pa e bon trabou.

21 di februari 2012

                                            WATER- EN ENERGIEBEDRIJF ARUBA (W.E.B.) N.V.

Asja Dongen

Relacionista Publico

e-mail: This e-mail address is being protected from spambots. You need JavaScript enabled to view it

                                                                                                                                     website: www.webaruba.com
                                                                                                                                                               Tel: (+297) 525-4671