COMUNICADO DI PRENSA

Den cuadro di tema ‘Cooperacion’ di Dia Mundial di Awa

WEB KIER APORTA NA REALISACION DI LEY DI AWA

ORANJESTAD –

Diabierna 22 di maart mundo ta celebra Dia Mundial di Awa pa di 20 biaha. E tema proclama pa Nacionnan Uni pa 2013 ta ‘Cooperacion riba tereno di Awa’. Cu e tema aki Nacionnan Uni kier enfatisa cu ta hopi importante pa nacionnan traha hunto pa por garantisa suficiente awa pa tur comunidad na mundo, pero tambe pa produci awa potabel na un manera sostenibel. ‘E tema aki ta uno cu ta cuadra sigur cu e strategia corporativo di WEB Aruba.’, asina relacionista publico Asja Dongen ta informa. Cu 80 aña di experiencia den desalinacion di awa, WEB den region di caribe a bin ta aporta na desaroyo di produccion di awa mas sostenibel y eficiente posibel. Den lus di e tema di cooperacion, WEB Aruba kier duna su aporte na Gobierno di Aruba pa formalisa regulacion di awa. Den e cuadro aki, WEB kier pone su conocemento disponibel pa yega na un asina yama ‘Waterwet’. Ya pone e prome contactonan pa trata e tema aki cu e ministernan concerni.

Aunke Aruba tin un trayectoria di 80 aña di produccion di awa potabel, realidad ta cu no tin un ley di awa na Aruba. Desaroyo rapido di nos pais, caminda sostenibilidad ta hunga un rol importante, ta pone cu dia pa dia un ley cu ta regula e ciclo di awa ta bira importante. Consumidornan, companianan, usuarionan grandi ta explora tur oportunidad di recicla awa, tanto pa preserva medio ambiente, pero sigur tambe pa motibo di eficiencia. Esaki ta resulta den diferente tipo di awa, banda di e awa awa cu nos ta bebe.

E desaroyo aki WEB ta mira como uno positivo, uno cu por contribui na preservacion di nos medio ambiente. Parti di e desaroyo aki ta cu mester por garantisa e calidad di nos awa y garantisa e impacto riba salud di hende. Pa e motibo ey WEB Aruba kier duna su aporte na gobierno di Aruba pa yega na legislacion di e ciclo di awa. Gerencia di WEB Aruba a trece e tema aki dilanti cerca ministernan Sevinger di Medio Ambiente, Oduber di Agricultura, Cria y Pesca y De Meza di Utilidad y Energia, cual a ser ricibi positivamente. Ta WEB Aruba su deseo pa sigui aporta den forma di un grupo di trabou cu representantenan di e diferente servicionan di gobierno pa asina realisa e legislacion.